मनस्विनी

रुक्मीणीला ओढ माझी
मी राजपदी आहे म्हणून...
सत्यभामेला ओढ माझी
स्वर्गीचा प्राजक्त आणला म्हणून...
द्रौपदीला ओढ माझी
प्रत्येक संकटात धावून गेलो म्हणून...
वृंदेला ओढ माझी
घरोघरी मानाचं स्थान दिलं म्हणून...
कुंतीला ओढ माझी
तिच्या मुलांना वाचवलं म्हणून...
अन् मला ओढ?
राधेची, फक्त राधेची
तिला फक्त मी हवा होतो म्हणून...
तिचं प्रेम माझ्या अमुक तमुक गोष्टीवर नाही,
फक्त माझ्यावर होतं म्हणून...
मला ओढ राधेची, फक्त राधेची...
माझ्यावर प्रेम करण्याची
तिला लाज वाटली नाही म्हणून...
माझ्यावर प्रेम करताना
तिला भीती वाटली नाही म्हणून...
आपल्या सावळ्याकडे धाव घेताना
तिने सारे अडसर झुगारले म्हणून...
माझ्यावर माया करताना
तिला परतफेड नको होती म्हणून...
मला ओढ राधेची, फक्त राधेची
ती मनस्विनी होती म्हणून...

- श्रीपाद कोठे
नागपूर