नवलकथा

नवलकथा ऐकवतोय
एका झाडाची
या झाडाने म्हणे,
एका पांथस्थाला
एक निवाराच मागितला
सावली हवी म्हणून...
एकाला तर चक्क
म्हणाले हे झाड़
की बाबा,
मला फिरायलाच घेउन चल
खूप कंटाळून गेलो आहे
एकाच जागी...
आणखीन एकाच्या तर
इतकं मागे लागलं
काय तर म्हणे,
माझ्याशी बोलतंच जा
माझ्याशी कोणी बोलत नाही...
त्या झाडाच्या
अशा विचित्र मागण्या ऐकून
त्याखाली विसावणारे सगळे
आता त्याला सोडून
गेले म्हणतात दुसरीकडे,
आणि बरं तर बरं
त्यांनी एकमताने
एक ठरावही केला की,
या झाडाला वेड लागलंय,
त्याला कुठे अधिकार असतो का?
असं काही मागायचा,
त्याने फक्त देतच राहायचं असतं,
वगैरे वगैरे...

- श्रीपाद कोठे
नागपूर