एक दिवस लपाछपी

एक दिवस लपाछपी खेळलो आपण
कुठे लपली होती कुणास ठाउक?
सापडलीच नाहीस लवकर
आणि मग भो केलंस एकदम...
मी रागावलो खूप,
हे काय खेळणं म्हणून...
तू म्हणालीस-
एवढा काय चिडतोस,
मी काय हरवले होते?
मग झाला समझोता
आणि खूप गप्पा मारल्या...
हरवण्याच्या अन् सापडण्याच्या...
रंगांच्या कांडया हरवल्या
तेव्हा तू कशी भांडलीस बहिणीशी,
आणि तुझी बाहुली हरवली
तेव्हा किती रडलीस...
माझी ब्याट हरवली
तेव्हा मी घर कसं डोक्यावर घेतलं
आणि सरांनी भेट दिलेलं पेन हरवलं
तेव्हा मी एका मुलाला कसं बुकलून काढलं
या सगळ्याची उजळणी झाली...
त्यावर तू म्हणालीस,
लहानपण कसं छान असतं
पण आता आपण मोठे झालोत
आता कळतं आपल्याला
अमुक काही हरवलं
त्यासाठी त्रागा नसतो करायचा,
नसतं वैतागायचं,
सोडून द्यायचं,
दुसरी वस्तू आणायची...
मीही शहाण्यासारखं हो म्हणालो,
अन् एक दिवस अचानक
तूच हरवून गेलीस
आणि क्षणार्धात मला कळलं
मी मुळीच मोठा झालेलो नाही...

- श्रीपाद कोठे
नागपूर