जिव्हाळ्याचा रंग

किती आवडतो तुला
लपाछपीचा हा खेळ
मला छळण्यात तुझा
जातो आनंदात वेळ...

कसा नियम अजब
तुझ्या खेळातील आहे
लपणार तूच आणि
शोधायचे मला आहे...
कधीतरी वाटते की
थोडे आपण लपू या
गाल फुगतात तुझे
आणि खेळ मोडलेला...
लपण्याच्या जागा सुद्धा
किती सापडती तुला
शोधशोधून थकतो
जीव कातावतो असा...
परी तुला काय त्याचे
वरी हसण्याचा छंद
मेटाकुटीस आणतो
तुझा खेळण्याचा ढंग...
पण सोडवत नाही
तुला शोधण्याचा खेळ
कसा जिव्हाळ्याचा रंग
मनी वाजतो मृदंग...
- श्रीपाद कोठे
नागपूर
सोमवार, २७ जानेवारी २०२०