झाड नाही सोडत

आपली जागा,
नदी नाही थांबत
एके जागी,
सूर्य उगवतो आणि मावळतो
रोज सारखाच,
चंद्र उगवतो रोज पण
कमीजास्त तेजाने,
पृथ्वी फिरते सतत
तरीही भासते स्थिर,
वारा कधी वाहतो
कधी थांबतो...
सगळेच वागतात
त्यांच्या त्यांच्या पद्धतीने,
नाही करत नक्कल एकमेकांची
नाही करत स्पर्धा वा ईर्षा
नाही ठेवत नावे एकमेकांना
करत राहतात निसर्गाने सोपवलेली कामे
त्यांच्या त्यांच्या पद्धतीने;
अन तरीही सावरून धरतात सृष्टी...
माणूस यांच्याकडून काही शिकला तर?

- श्रीपाद कोठे
नागपूर
गुरुवार, ३१ ऑक्टोबर २०१९