यमनाच्या संध्याकाळी

यमनाच्या संध्याकाळी
मौनास बांधल्या गाठी
स्वरकल्लोळाच्या पोटी
क्षणिकांची दाटीवाटी...

यमनाच्या संध्याकाळी
येतात वादळे आणि
अंधुक आठवांचीही
सरिता नाचत जाई...
यमनाच्या संध्याकाळी
आम्रतरुला धरुनी
अल्लड वारा अजुनी
झोपाळा झुलवीत राही...
यमनाच्या संध्याकाळी
विस्मृतीच्या पारावरती
नेत्रांच्या थिजल्या वाती
पुन्हा उजळूनी येती...
यमनाच्या संध्याकाळी
उत्फुल्ल निशेच्या भाळी
शेंदूरटिळा रेखाया
किरणांची होते दाटी...
यमनाच्या संध्याकाळी
गातात पाऊले वेडी
काळाच्या पाऊलवाटी
सरलेल्या गाठीभेटी...
यमनाच्या संध्याकाळी
लाटातून लाटा उठती
बुडलेले सारे काही
घेऊन किनारी येती...
यमनाच्या संध्याकाळी
वेणूचा नाद सभोती
धरणीला देऊन जाती
स्वर्गीचे चांदणमोती...
यमनाच्या संध्याकाळी
खेळ असा हा खुलतो
हसता हसता थोडा
पापणीत साकळतो...
- श्रीपाद कोठे
नागपूर
शनिवार, १८ जानेवारी २०२०