अदलाबदल

एकदा बदलली नावे फुलांची
मोगऱ्याला आवाज दिला - 'ए कुंदा'
कुंदाला आवाज दिला - 'ए मोगऱ्या'
काहीच बदल झाला नाही,
टपोरेपण अन सुवास
मोगऱ्याला सोडून गेले नाहीत;
टवटवीत शुभ्रता
कुंदाला सोडून गेली नाही;
खजील झालो
खट्टू झालो
पुन्हा केला प्रयत्न;
दोघांनाही आता
बेशरमची फुलं म्हटलं,
तरीही ती जशीच्या तशीच;
मग वळवला मोर्चा
बेशरमाकडे
त्याला म्हणत राहिलो -
गुलाब, मोगरा, चमेली
चंदन, वड, पिंपळ
आंबा, फणस, पेरू
- असं काही काही;
पण नाही पडला
फरक त्यालाही काहीच;
झाडांना, फुलांना, फळांना
नाही पडत फरक
या नावाने वा त्या नावाने;
मलाही मिळतात बरीच नावे,
पण...

- श्रीपाद कोठे
नागपूर
रविवार, १५ डिसेंबर २०१९