कालातीत !!

मी होतो काळाआधी
मी राहीन काळानंतर
काळाच्या नदीतीरावर
माझे वास्तव्य निरंतर...

माझ्यातून उगवे पृथ्वी
उगवती ग्रह तारेही
आकाशी भरुनी आहे
माझीच सावळी नक्षी...
काळाच्या उदरी जे जे
ते माझ्यातून आले आहे
काळाला सोडून जाते
तेही माझ्यात मिसळते...
काळाच्या भवतालीही
आहे मीच भरोनी
काळाच्या कंठातूनही
माझीच प्रसवते वाणी...
काळाचा महिमा थोर
गातात संत, साव, चोर
त्याचाही अवघा भार
आहे माझ्या खांद्यावर...
मजला नावही नाही
नाहीच मोजमापही
पल्याड गुणरुपांच्या
मी कालातीत विदेही...
- श्रीपाद कोठे
नागपूर
रविवार, २७ ऑक्टोबर २०१९