मृगजळ !!

मृगजळ कधीच फसवत नाही
अगदी कधीच...
फसतो आपण
अन म्हणतो
फसवलं मृगजळाने...
मृगजळ कधी बोलावतं का?
आपणच जातो त्याच्याजवळ
तहानलेले होऊन
अन ते अदृश्य होतं
जवळ गेल्याबरोबर
जे मुळात नसतंच कधीच कुठे;
सावलीत, थंडीत चालताना
नाही भेटत कधीच मृगजळ,
ते भेटतं
फक्त रखरखत्या उन्हात
असह्य ताप सहन करत चालताना
घशाला कोरड पडते तेव्हा
जीव तळमळतो तेव्हा;
उगवतं अचानक
बोलावत नाही
पण खेचून घेतं,
उरफोड करत धावतो त्यामागे
अन जवळ पोहोचतो तर
काहीच नाही...
नसतं खरं तर काहीच
तरीही वाटतं आहे
तेच मृगजळ !!
खरी फक्त तहान असते,
खरा फक्त शोष असतो,
खरं फक्त तापणं असतं,
खरा फक्त भ्रम असतो,
खरा फक्त भ्रमनिरास असतो...
मृगजळ सुद्धा खोटं नसतं
खरंच, खोटं नसतं मृगजळ
कारण, खोटं असायला
ते मुळात असावं लागतं !!
मृगजळ तर नसतंच...
कोण जन्माला घालतं
नसलेल्या मृगजळाला,
कोण अदृश्य करतं
नसलेल्या मृगजळाला,
कोण भोगायला लावतं
मृगजळाला अकारण
- तहानलेल्याची नाराजी,
तोच खरा दोषी
तोच खरा गुन्हेगार
तोच खरा पापी;
सांभाळून ठेवा आपल्या शुभेच्छा,
सांभाळून ठेवा आपल्या सदिच्छा,
त्या
दोषी, गुन्हेगार अन पाप्यासाठी
जेव्हा मिळेल त्याच्या कर्माची सजा
तेव्हा त्याला गरज पडेल म्हणून...

- श्रीपाद कोठे
नागपूर
सोमवार, १३ जानेवारी २०२०