अंदाज

समुद्राच्या काठी
असतो कचरा, असते घाण
पण त्यावरून करू नये
त्याच्या पोटातील रत्नांचा अंदाज;
समुद्राच्या काठी
असते वाळू
पण त्यावरून करू नये
त्याच्या गर्भातील माशांचा अंदाज;
समुद्राच्या काठावर
दिसते त्याची खळबळ
पण त्यावरून करू नये
त्याच्या गांभीर्याचा अंदाज;
समुद्राच्या काठावर असते
पाणी पाऊलभर
पण त्यावरून करू नये
समुद्राच्या खोलीचा अंदाज;
माणसांचाही
अंदाज करू नये असाच
त्याच्या काठावर दिसणाऱ्या
काहीबाही गोष्टींवरून !!

- श्रीपाद कोठे
नागपूर
सोमवार, ३० डिसेंबर २०१९