असे लाभावे काळीज

असे लाभावे काळीज
ज्यात सामावेल जग
मिळालेल्या फुलासंगे
मनी जपावे दगड...

घ्यावे ठेवून कौतुक
उपेक्षेच्या आडोशाने
प्रेमबोलांच्या संगती
द्वेषाचेही घोट घ्यावे...
गोड घास भरवावे
लाडावल्या जीवनाला
कडू जहरही प्यावे
भाळी आठी न घालता...
जरी लाभले ना सौख्य
चक्र नियमानुसार
तरी पडू नये पीळ
गांजलेल्या अंतरात...
निखाऱ्यांची व्हावी फुले
प्रहारांचे गेंद व्हावे
मनातल्या कोपऱ्यात
नकोशांना स्थान द्यावे...
अंतरात ज्वालामुखी
जळतो तो जळू द्यावा
दूर ढकलता कोणी
वाणीतून देव गावा...
अंतरातल्या जळवा
अंतरात सुखे नांदो
रक्त प्राशता तयांनी
चंदनाचा गंध दाटो...
सारे सारे निरर्थक
सारे सारे छळणारे
अंगांगाचा दाह जरी
तुळशीचे भाग्य लाभो...
- श्रीपाद कोठे
नागपूर
गुरुवार, १७ ऑक्टोबर २०१९