मीच माझा हुंकारतो

तुझ्या सोबतीची शाल
अंगावर पांघरतो,
तुझ्या अदृश्य हातांची
ऊब मनी जोजवतो...

तुझी अमूर्त आकृती
माझ्या बाजूने चालते,
माझ्या पावलांच्या संगे
तुझे पाऊल पडते...
माझ्या संगे वेचतात
आजूबाजूचा आनंद
तुझ्या अबोल डोळ्यांना
कसा लागला हा छंद...
माझ्या कंठातले गाणे
तुझ्या स्वरातून येते
तुझ्या शब्दांची पालखी
दारी ठेऊनिया जाते...
माझा जीव तुझी छाया
माझा भाव तुझी माया
परसात बागडतो
तुझा चंदनाचा पावा...
उभा चंपक शेजारी
घाली अंगणात सडा
तुझ्या पाऊली दाटतो
वनी फुलला केवडा...
भोवतीचे सारे सारे
तुझ्या रंगात नाहते
आत खोलवर सारे
तुझे अरुप पाहते...
आहे तरी कसे म्हणू
कसे म्हणू नाहीस तू,
तुला हाकारतो आणि
मीच माझा हुंकारतो...
- श्रीपाद कोठे
नागपूर
मंगळवार, ३१ डिसेंबर २०१९