समजून घेताना...

मी समजून घेतो तुला
माझ्या बाजूने,
कधी कधी तुझ्या बाजूने;
असंच समजून घेतो
आपल्यात जे काही
असेल नसेल ते,
या किंवा त्या बाजूने;
ना माझी बाजू असते पूर्ण
ना तुझी बाजू असते पूर्ण;
मला व्हावे लागेल
माझ्यापासून दूर,
मला व्हावे लागेल
तुझ्यापासून दूर;
अन उभे राहावे लागेल
त्या बिंदूवर
जिथून दिसतील मला
मी, तू, अन
दोघातील असले नसलेले
सारे काही पूर्ण रुपात;
त्या बिंदूलाच असते नाव -
सत्य, ईश्वर, धर्म, न्याय
किंवा मानवता
किंवा प्रेम !!
माझ्याकडे आहे यातील काही?
तुझ्याकडे आहे यातील काही?

- श्रीपाद कोठे
नागपूर
सोमवार, २० जानेवारी २०२०