भोवरा

शांतपणे वाहते रेवा
परवीनच्या `रजनी कल्याण'सारखी
एक मडके,
त्या प्रवाहाला सोबत करीत
अस्थिकलश... कुणा एकाचा
कधीतरी नाव, रूप लाभलेला
कधीतरी नाव, रूप हरवलेला
नक्षत्रवेडा की मित्र काट्याकुटयांचा
येताना ओठभर हसू आणलेच असेल
किमान एखादीच्या चेहर्यावर
जाताना डोळाभर रडले असेल कुणी?
असेलही...
दोन-चार हाडे कुठेतरी
मिसळून जातील मातीत
अन् संपेल सारे
एका चक्राची पूर्ति ! समाप्ती !! की प्रारंभ?
झगडा, `मी' चा...
कधीपासून, कशासाठी?
कोणाच्या इच्छेने?
प्रश्नांचे भोवरे
रेवेच्या पात्रात
अतृप्त, अस्वस्थ
भोवर्यान्ना जन्म देत

- श्रीपाद