धावत धावत ये

ये ना गं लवकर
नको अंत पाहूस,
कालपासून अंथरलेल्या
माझ्या नयनांच्या पायघड्या
सुकून जातील बघ,
रात्रंदिवस रोखून ठेवलेले श्वास
निसटून जातील कुठेतरी... ...
ये, लवकर ये
धावत धावत ये... ...
तुझी चाहूल घेउनच तर येते
माझी प्रिया
अन् तू निरोप घेताच
निघूनही जाते,
काही घटकांची भेट
तुझी नि माझी
तिची नि माझी...
तेवढीच तर वेळ असते
माझ्या जगण्याची
कान्ह्याची बासरी ऐकण्याची
हंबरणार्या कपिलेला गोंजारण्याची,
तेवढीच वेळ असते
झुळझुळणार्या झर्याची
चिवचिवणार्या पक्ष्यांची
खळाळणार्या हास्याची,
तेवढीच वेळ असते
कुजबुजणार्या शपथांची
टपटपणार्या फुलांची
मुसमुसणार्या हुंदक्यांची
ऊसासणार्या विरहाची... ...
म्हणून ये,
धावत धावत ये

- श्रीपाद