त्यांनी कदाचित समुद्र पाहिला नसावा

एके दिवशी
सायंकाळच्या गप्पाष्टकात
खूप वाकून पाहिले त्यांनी
माझ्या मनात;
दिसले त्यांना
खूप काही
सांडलेले, विखुरलेले
इकडे तिकडे
आश्चर्य वाटले त्यांना
आणि निराशाही;
त्यांनी कदाचित
समुद्र पाहिला नसावा

एके दिवशी पाहिले त्यांनी
माझे आकांडतांडव
माझा आक्रोश, आवेश
माझे गरजणे, बरसणे
आवेगाने फुटून जाणे
वारंवार उसळणे
अन् पुन्हा कोसळणे
त्यांना भीती वाटली
अन् चिंताही;
त्यांनी कदाचित
समुद्र पाहिला नसावा

- श्रीपाद