थट्टा

दिवस सरला
संध्याकाळ झाली
आकाशरंग तसेच
नीळे, लाल, गुलाबी, भगवे
मधे मधे पांढरे पुंजके
पहाटे होते तसेच... ... ...
तूही तसाच
पहाटेसारखाच
ओरडतोही तसाच आहे
तुझी काव काव ऐकूनच तर
झोपेतून जाग आली
तू दिलेली ती सादच
दिवसभर रुंजी घालत होती मनात
त्यामुळेच दिवसही गेला उत्साहात
आशादायी पहाटेनंतर
उत्साहपूर्ण दिवस... ... ...
पण सकाळचे उत्साही रंग
आता मलूल झालेत
उदास झालेत
चित्तहारी माणूस येणार येणार
म्हणत दिवस गेला
पण काहीच खबरबात नाही त्याची,
तुला नाही कळणार ही उदासी
पण एक ऐकशील
पुन्हा नको असा ओरडूस
पहाटे पहाटे,
अशी थट्टा करू नये रे कुणाची...

- श्रीपाद