अंतरंग

काका मला तो पिवळा
मला हिरवा द्या काका
मला लाल
मला निळा

हे तुझे पैसे बेटा
तुझा झाला एक रूपया
तुला गं काय हवं

शाळेजवळच्या फुगेवाले काकांच्या
दुकानावर रोजचेच संवाद पार पडले
रोजच्या सारखेच

अन्,
अन् वेगळेच काहीतरी घडले आज
रोजच्यापेक्षा
रोज न येणारी ती मुलगी
हळूच जवळ गेली त्यांच्या
अन् म्हणाली-
`अहो फुगेवाले काका'
`काय गं बेटा'
काका, तो काळा फुगाही
उडतो का हो
हवेत उंच??
हो गं बेटा
तोही उडतो असाच
इतर फुग्यांसारखाच
हवा तुला?
आणि काकांनी फुगा दिला
त्या मुलीच्या हाती
आणि म्हणाले-
`घे तुला ही भेट
माझ्याकडून'
तीही निघून गेली आनंदाने
फुगा उडवत

आणि कुबड्या घेउन जाणार्या
त्या काळ्या मुलीकडे पाहात
काका स्वत:शीच पुटपुटले-
`फुगा रंगाने वर नाही जात बेटा
त्याच्या आतील हवेने जातो...'

- श्रीपाद