सतत चालतोय
पाचवीला पूजल्यासारखा
कधी प्राचीची दिशा धरून
कधी अस्ताचलाकडे,
कधी धावणाऱ्या
अन कधी गोठलेल्या वाटांनी,
उत्फुल्ल फुलांनी सजलेल्या
अन निराशा पांघरलेल्या रस्त्यांनी,
आपुलकीच्या मायेने जवळ करणाऱ्या
अन बेगुमान झिडकारणाऱ्या पायवाटांनी,
अंधार आणि उजेडाच्या
गुळगुळीत आणि खड्ड्यांच्या
कुसुमांच्या अन काट्यांच्या
पौर्णिमेच्या अन अमावास्येच्या;
एकच आधार
एकच सोबत
एकच साथ
अखंड...
तुझ्या पद्मरेखांची !!!
- श्रीपाद कोठे
नागपूर
शनिवार, २८ एप्रिल २०१८
कोणत्याही टिप्पण्या नाहीत:
टिप्पणी पोस्ट करा