अज्ञाताच्या घरून येति

हरिप्रसादजींना अनेकदा ऐकलं आहे. प्रत्यक्ष सुद्धा पुष्कळ ऐकलं आहे. पण आज त्यांचा 'धानी' ऐकताना पहिल्यांदाच मनात काही आलं. तेच हे-

अज्ञाताच्या घरून येति

अज्ञाताच्या घरून येती सूर कसे देखणे
अनाकृतीला रूप लाभते तुझीया श्वासाने
लपलेला आनंद डोलतो कैसा शून्यातून
काय नाचते थुई थुई ते, पोकळ वेळूतून
अनोळखी ते गाव सुरांचे वसते कोठे रे?
कधी जाशी अन कैसा येशी, कानी सांग ना रे
नसते काही तेही असते, कुठे झाकलेले
कसे गावते कसे लाभते, काय तुझे नाते?
धन्यवाद हा शब्द तोकडा तुझ्या निर्मितीला
अखंड लाभो तुजला ऐसे आशीष देवाचे
तुझ्यातून जे वाहत येई दिव्य चेतनामय
प्रमुदित होवो त्याने अवनी, आणि आल्हादित

- श्रीपाद कोठे
नागपूर
सोमवार, ५ मार्च २०१८