वाट पाहतो तुझी प्रियतमा
धावत धावत ये ना
हे चिरसोबती, माझी प्रतीक्षा
लवकर संपव ना...
तुझे भेटणे ही तर नियती
ठाऊक तुजला ना
का रे करिसी विलंब मग तू
प्रेमळ होऊन ये ना...
अखंड सोबत तरीही नाही
भेट कधीही अपुली
नाही चाहूल आणि पदरव
मौन साधना कसली?...
उभा ठाकतो कधी अचानक
अनपेक्षित रे किती?
आवडते का लपाछपी तुज
जन्मभरीची असली...
सोडूनि जातो क्षणभरीही ना
ना रे भेटही क्षणाची
असली गंमत जन्मभरीची
त्रास किती तू देशी?...
नाही ठाऊक वेळ तरीही
येणे निश्चित असते
त्याचसाठी तर हाती सुमने
जन्मभरी वागविणे...
मैत्र आपुले स्मरून मानसी
विलंब नको रे करू
येण्याआधी कानी सांग तू, कैसे
मरणा तुजसी वरू?
- श्रीपाद कोठे
नागपूर
सोमवार, २६ फेब्रुवारी २०१८
कोणत्याही टिप्पण्‍या नाहीत:
टिप्पणी पोस्ट करा