ओंजळ !!

ओंजळ असेल
तेवढंच घेता येतं
देणाऱ्याने कितीही दिलं तरी !

ओंजळ असेल
तेवढंच देता येतं
देण्याला कितीही असलं तरी !
ओंजळ भरली असेल तर
काही घेताही येत नाही
काही देताही येत नाही !
ओंजळ करावी लागते रिकामी
देण्यासाठीही
घेण्यासाठीही !
ओंजळीचा आकार
नाही करता येत कमी
नाही करता येत मोठा !
ओंजळ रीती करताना
असावा लागतो
ओंजळ स्वीकारणारा !
ओंजळ भरताना
असावा लागतो
ओंजळ भरणारा !
ओंजळ फक्त आपली
आकार; भरणे, रिक्त होणे
सगळं दुसऱ्या कुणाचं तरी !
- श्रीपाद कोठे
नागपूर
बुधवार, १९ जून २०१९