चांदणवेळा !!

ती चांदणवेळा माझी
माझ्यात जागते तेव्हा
तुडुंब होऊन जाते
माझ्यात युगांची तृष्णा

ती अपूर्ववेळा जेव्हा
मांडते पसारा सारा
अंधार सांडूनी जाती
अंतरीच्या संध्याछाया
ती उत्कटवेळा येते
करात घेऊन काही
चराचरातील श्वास
त्यावेळी थांबून जाती
ती अद्भुतवेळा देते
तिच्या करातील सारे
घेताना गोठत जाती
कंठीचे प्राणपिसारे
ती वेळा भिनते ऐसी
मी होतो नभ तात्काळ
अणूरेणूतून माझ्या
घुमतो प्रणवाकार
- श्रीपाद कोठे
नागपूर
बुधवार, २४ जुलै २०१९