तो फुलेबिले तोडतो,
पाणी घालतो झाडांना,
काढतो पिवळी पाने वगैरे,
थोडी साफसफाई करतो,
तेव्हा चिकटतात
काही पाने, फुले, काड्या
कधी थोडी जळमटेही,
त्याच्या हातापायांना, केसांना
कपड्यांना, चपलांना,
अन मागे लागतात त्याच्या
आम्हालाही यायचंय म्हणून,
तोही फिरतो त्यांना बरोबर घेऊन;
अन लोक त्याला सांगतात-
तुला हे चिकटलंय,
तुला ते चिकटलंय,
... त्यांना कोण सांगणार
तो त्या पानाफुलांच्या,
काड्यांच्या
अन जळमटांच्या सोबत
फिरायला निघालाय ते...
- श्रीपाद कोठे
नागपूर
रविवार, २७ डिसेंबर २०१५
नागपूर
रविवार, २७ डिसेंबर २०१५
