उतार चढाव

हा म्हणाला-
एवढा चढाव चढायचा आहे,
तो म्हणाला-
एवढा उतार उतरायचा आहे,
कुणीतरी म्हणालं-
इथे ना चढाव आहे, ना उतार आहे,
इथे फक्त रस्ता आहे,
हा बोलला-
रस्त्याच्या पायथ्याजवळून,
तो बोलला-
रस्त्याच्या वरच्या टोकावरून,
कुणीतरी बोललं-
रस्त्याच्या कडेने...
******************************
अस्तित्वात फक्त रस्ता आहे
चढाव आणि उतार
वेगवेगळ्या ठिकाणी
वेगवेगळ्या मनात आहे...
********************************
हा वर गेला की,
चढावाचा उतार होणार आहे,
तो खाली आला की,
उताराचा चढाव होणार आहे

- श्रीपाद कोठे
नागपूर
शनिवार, १८ एप्रिल, २०१५