सखे...

सखे,
दु:ख गोड असतं?
दु:ख सुंदर असतं?
दु:ख हवंसं असतं?
तुला काय वाटतं?
मला वाटतं, हो-
दु:ख- गोड, सुंदर, हवंसं असतं...
गडद संध्याकाळी
मारवा ऐकतो ना आपण
तेव्हा कळतं हे...
हरवलेल्या पंचमाला शोधत
सगळे स्वर फिरत असतात
जीवाच्या आकांताने
आणि पंचम मात्र नाहीच सापडत
जणू तंबूचा मधला खांब
असल्यासारखा पंचम
नसतो हाताशी, अन
तरीही साधायचा असतो तोल
उतरायचं असतं समेवर
...
...
...
जसा दर संध्याकाळी
मी उतरतो ज्ञात अज्ञाताच्या धरेवर
तोल सांभाळत, तुझ्याशिवाय...
...
...
...
प्रत्येकाचा एकेक पंचम असतोच ना,
कुणाला पिळवटून टाकणारा
मारवा गात
शोधावा लागतो आपला पंचम;
पण तेव्हाच कळतं
दु:खही- गोड, सुंदर, हवंसं असतं...

- श्रीपाद कोठे
नागपूर
मंगळवार, २६ मे २०१५