तो

तो होता माझ्याआधी
तो राहील माझ्यानंतर,
तो श्वासांच्या आधी होता
तो राहील श्वासांनंतर,
काळाने नेत्र उघडले
त्याही आधी तो होता,
काळाचे नेत्र मिटतील
त्यानंतरही तो राहील,
कर्माच्या इच्छेआधी होता तो
कर्माच्या इच्छेनंतरही राहील तो,
उजेड पडण्याआधी तो होता
तो राहील उजेडानंतर,
सुखाच्या आधी तो होता
सुखाच्या नंतरही तो राहील,
तो असतो आधी, नंतर
मधले अंतरही तो असतो,
काही असण्याआधी असतो तो
तो असेल काही नसल्यानंतर,
अधेमधेही असतो असतो
तोच असतो काही असणे
तोच काही नसणे असतो !!
- श्रीपाद कोठे
नागपूर
गुरुवार, १४ मार्च २०१९