त्याचा रंग

`काय रे,

हा कुठला रंग आणलास?

रंगांच्या सणाला हा काळा कशाला?'

विचारणाऱ्याच्या डोळ्यात बघत

त्याने विचारले-

`का? हा रंग नाही?

अन त्यानेच केलाय ना तयार

ज्याने हे सप्तरंग तयार केलेत?'

प्रश्नकर्ता गडबडला...

तो पुढे म्हणाला-

`त्यानेच दिलाय मला

हा काळा रंग

मी खेळतोय मनसोक्त तो...

तू खेळ तुझे रंग

त्याने तुला दिलेले...

हां, माझा रंग नाही टाकणार तुझ्यावर

हे रंग देणाऱ्यानेच घातलेय बंधन तसे,

तू मात्र टाकू शकतोस

तुझे रंग माझ्यावर

पाहा काही बसलेत तर...'

प्रश्नकर्त्याने केला खूप प्रयत्न

त्याच्या काळ्या रंगावर

आपले रंग टाकण्याचा

पण व्यर्थ

एकाही रंगाचा टिपूसही नाही टिकला

निराश होऊन जाऊ लागला प्रश्नकर्ता...

तेव्हा तो म्हणाला-

`हा त्याचाच रंग आहे

ज्याने केलेत हे रंग तयार

मला त्याचा रंग मिळालाय...'

- श्रीपाद कोठे

नागपूर

मंगळवार, १९ मार्च २०१९