युगपुरुष

माणूस चालतो चंद्रावर
गुरुत्वाकर्षणाशिवाय
तरंगत तरंगत
न बांधलेल्या पायांनी
बिना ओढीने
चंद्राशी संबंध न ठेवता…
तशीच जगतात
माणसे काही
या पृथ्वीवर
गुरुत्वाकर्षणाशिवाय
तरंगणाऱ्या मनांनी
कशाशीही न बांधलेली
बिना ओढीने
संबंधशून्य...
कोणत्याही चुंबकाशिवाय
जगणारी ही माणसे
होतात विघटित
अन पसरते त्यांची धूळ
हवेवर, वातावरणात...
मात्र,
काहींची होते पृथ्वी
जडशीळ
जिच्या पोटात जन्म घेतात
असंख्य ज्वालामुखी
अनेक सागर
अपार खनिजे अन वनस्पती
अन गुरुत्वाकर्षण सुद्धा
हे गुरुत्वाकर्षण
आकर्षून घेते साऱ्यांना...
गुरुत्वाकर्षण गमावलेल्या मनात
गुरुत्वाकर्षण जन्म घेते
तेव्हा
जन्माला येतो युगपुरुष !!
- श्रीपाद कोठे
नागपूर
मंगळवार, २९ जानेवारी २०१९