संध्यास्वप्ने पेरीत जातो पिंपळपारावर
कुणी गारुडी धून वाजवी बंद दारावर
अंगणातली जुनी पाऊले काय बोलतात?
पाचोळ्यातून मंदपणाने काय शोधतात?
उन्मादाच्या कबरीवरची पणती अंधारी
सांत्वनझेले इतिहासाचे विकले बाजारी
पक्षी-घरटे, फुले-काटक्या आणि कोळीष्टके
उजेड वारा मुक्त तरीही, असे कोंदलेले
दह्या दुधाची दिव्य प्राक्तने नटली, विटली
वठली आणिक भुते होऊनी लपली येथे
रक्तगोठल्या, रक्तवाहत्या जखमांमधले
नश्वर सगळे मातीमध्ये मिसळत आहे
दगड पायरी थंडपणाने उतरे कोण?
तीच पायरी पुन्हा एकदा चढतो कोण?
स्मशानशांति येते चालत जेथे वारंवार
जीवनपक्षी तिथे घालतो घिरट्या अपरंपार
- श्रीपाद कोठे
नागपूर
शनिवार, ३१ मार्च २०१८
कोणत्याही टिप्पण्या नाहीत:
टिप्पणी पोस्ट करा