तो

समोरून काढलेला
पाठमोरा काढलेला
डाव्या बाजूने काढलेला
उजव्या बाजूने काढलेला
प्रकाशातला, अंधारातला
अंधार, प्रकाशाच्या मिश्रणाचा
टोपी घातलेला
पूर्ण केस काढलेला टकलू
डोक्यास रुमाल बांधलेला
गाडीतला, गाडीवरचा, पायी
विमानातला आणि बैलगाडीतला
चष्मा लावून आणि डोक्यावर चढवून
शर्ट, टी शर्ट, झब्बा, कुर्ता
हसरा, नाचरा, रडका, उदास
कित्येक रंग, किती आकृती
कित्येक भाव, किती विकृती
आयुष्यातल्या किती अवस्था

****************************
समोर फोटोंचा ढीग
स्वत:ला निरखत
स्वत:लाच ओळखण्याचा खेळ

******************************
समोर फोटोंचा ढीग
मला निरखत
मला ओळखण्याचा खेळ
इतरांचा
त्या खेळातील स्वगतं-
किती वेगळाच आहे ना हा फोटो
यात तर ओळखायलाच येत नाही
यात किती वेगळाच दिसतो ना
हा तुझा फोटो आहे?
छे, हा नक्कीच दुसरा कोणीतरी
इतका गोरा कधी होता तू?
यात खूपच काळा दिसतो

*****************************
मला न पटलेली माझी ओळख
इतरांना न पटणारी माझी ओळख

******************************
फोटोंचा ढीग कुणीतरी आवरतं
एक एक करून नजरेखालून घालतं
त्याचं स्वगत-
अरे, हे तर सगळे तुझेच फोटो

*****************************
रंग, रूप, प्रकाश, कपडे
साऱ्यात वाटून मग
मला शोधणारा
मी आणि इतर... ... ...
रंग, रूप, प्रकाश, कपडे
याच्या आतील
मला पाहणारा तो... ... ...

- श्रीपाद कोठे
नागपूर
गुरुवार, २४ जुलै २०१४