खिडकीबाहेर वाजणारा पाऊस

खिडकीबाहेर वाजणारा पाऊस
कधी छेडतो सतार,
कधी फुंकतो बासरी
कुणासाठी वाजवतो यमन
आणि कुणासाठी अभोगी

खिडकीबाहेर वाजणारा पाऊस
येतो दूर समुद्रावरून
कधी जातो चिंब भिजवून
कधी जातो कोरडं करून
कुणाचं तरी अंतरंग

खिडकीबाहेर वाजणारा पाऊस
उतरत जातो मनात खोल
समजून घेता त्याचे बोल
मुक्यानेच सावरतो तोल
किशोरीच्या `सहेला रे'चा

- श्रीपाद कोठे
नागपूर
गुरुवार, १७ जुलै २०१४