पाऊलखुणा...?? !!!

किती चाललो?
कोणास ठाऊक,
बरेचदा उगवला सूर्य
आणि चंद्रही पौर्णिमेचा,
तरीही दिसत नाही
एकही खुण
मातीवर उमटलेल्या पावलाची
ना माझ्यापुढील रस्त्यावर
ना माझ्यामागील रस्त्यावर;
लाखो माणसांनी तुडवलेला हा रस्ता
एकाही पाऊलखुणेशिवाय?
आणि आपल्या पाऊलखुणा?
त्याही नाहीत...
अरे हो... विसरलोच की,
रस्त्याच्या प्रारंभाला उभ्या
रखवालदाराने घातलेली
एकमेव अट
या रस्त्याने जाण्यासाठी-
प्रत्येक पुढचे पाऊल टाकण्याआधी
मागच्या पावलाची खुण
पुसून टाकण्याची
आणि नाहीच पुसली एखाद्याने तर?
तो स्वत:च पुसतो म्हणे...

- श्रीपाद कोठे
नागपूर
रविवार, १३ जुलै २०१४