कसा रे तू?

 

कसा रे तू?

अजूनही विश्वास टाकतोस सगळ्यांवर

कमी तोंडघशी पडलास का आजवर

पैसा म्हणू नको

प्रेम म्हणू नको

शब्द म्हणू नको

मैत्री म्हणू नको

नाती म्हणू नको

माणुसकी म्हणू नको

किती वेळा तोडलाय विश्वास तुझा

तरीही तू तसाच

बावळट, व्यवहारशून्य

शेकडो वेळा विश्वासघात होऊनही

सगळ्यांवर विश्वास टाकत सुटतो;

त्याची कळकळ शांत झाल्यावर

हा म्हणाला-

मित्रा, तू खूप चांगला आहेस

पण तुझं गणित थोडं पक्क करून घे

या जगाची लोकसंख्या आहे ७०० कोटी

अन आपल्या शहराची म्हणशील

तर तीही काही लाखात

आणि तूच म्हणतोस ना

शेकडो वेळा माझा विश्वासघात झालाय

मी म्हणतो

फक्त शेकडो वेळा

अजून खूप जग बाकी आहे

विश्वास टाकायला

अन तुला सांगू?

७०० कोटी विश्वासघात झाले तरीही

विश्वास टाकणे थांबवणार नाही

अगदी ईश्वराने विश्वासघात केला तरीही

जोवर मीच माझा विश्वासघात करीत नाही

तोवर विश्वास थांबवण्याचं

मला कारणच नाही

अन मला नाही वाटत

मीच माझा विश्वासघात करेन म्हणून

- श्रीपाद कोठे

नागपूर

सोमवार, ११ सप्टेंबर २०१७