सत्य

काय म्हणतोस?
सत्य हवंय !
नको रे
असा हट्ट करुस
सोडून दे सत्याचा ध्यास...
नाहीच ऐकणार तू
नक्की हवंय सत्य
पक्का विचार कर...
ठीक आहे तर,
सत्य हवंय ना तुला
मग जा
आणि जळून जा !!
कारण सत्य म्हणजे जळणे
अखंड, संपूर्ण, नि:शेष जळणे;
सत्य नाही बासरी रिझवणारी
सत्य नाही खाऊ भूल पाडणारा
सत्य नाही शय्या मृदू पुष्पांची;
सत्य म्हणजे निखारे
सत्य म्हणजे ज्वाळा
सत्य म्हणजे होळी
सत्य म्हणजे जाळ...
जा, जळून जा
अन नको विचार करुस
तुला सत्य गवसलं की नाही
हे मला कसे कळेल याचा,
मला काहीच कळणार नाही
अन मला समजून जाईल
जळून गेलायस तू पूर्ण
झालीय तुझी राख
गवसलंय तुला सत्य...
जा-
सत्य तुझी वाट पाहतंय !!

- श्रीपाद कोठे
नागपूर
शुक्रवार, ९ ऑगस्ट २०१९