फडफड

रात्रीच्या आठ नऊचा सुमार
चौकातल्या वळणावर
लगबग सुरू होते
दहाएक वर्षांच्या
तीन चार मुलांची
दुकानाची आवरसावर करायला...
फडफड फडफड आवाज येतात
मुलांनी पाय धरून
जाळीच्या पिंजऱ्यात टाकलेल्या
कोंबड्यांच्या पंखांचे...
काय बोलत असतील ते पंख?
काल रात्री वस्तीला असलेल्या
अन आज नसलेल्या
मित्र मैत्रिणींविषयी
की,
एक रात्र अधिक वाट्याला आली त्याबद्दल?
मुले बंद करतात पिंजरे
दुकानही बंद होते
पलिकडे देवळात
'सर्वेपि सुखिन: सन्तु'
मौन पांघरते
माझ्या निद्रापूर्व प्रार्थनेसारखे

- श्रीपाद कोठे
नागपूर
रविवार, ११ मार्च २०१८