होळी

जाळून टाकायचे असतात
मनातील राग, द्वेष, विकार, विकल्प
होळीत टाकून,
लहानपणापासून
सांगत असत सगळे...
त्यांचं ऐकून
केलीही सुरुवात त्याला
सुरू झाली रागद्वेषाची होळी
पण... ... ...
एक होळी आटोपल्यावर
येत असे रागद्वेषाचे पीक तरारून
पुन्हा पुढल्या होळीपर्यंत...
एक झेंगटच लागले मागे
रागद्वेषाची होळी पेटवण्याचे,
मग ठरवले
पूर्ण बंदोबस्त करायचा
कायमचा
पुन्हा पुन्हा तेच तेच बरे नाही
अन निर्धाराने पेटवली होळी
रागद्वेष तयार करणाऱ्या यंत्राची
दिली आहुती स्वतःचीच...
आता चिंता नाही
रागद्वेषाचे पीक
आता तरारणार नाही

- श्रीपाद कोठे
नागपूर
शुक्रवार, २ मार्च २०१८