तुझा माझा हा अभंग

माझ्या धुळीत दाटती
तुझ्या पावलांचे ठसे
आल्यागेल्यास सांगती
येथे गोकुळ नांदते

माझ्या आकाशी दाटतो
तुझ्या श्वासाचा सुगंध
पानापानात फुलतो
अनामिक मर्मबंध

माझ्या अवतीभवती
तुझी मौन शब्दफुले
फेर धरुनी नाचती
अन घालतात कोडे

माझ्या अंतरी वाजती
तुझे नुपूर नाजूक
आसमंती लहरते
जाईजुईची लकेर

खेळ चालतो हा खुळा
दिनरात अखंडित
बिना चाहुलीचा कसा
तुझा माझा हा अभंग

- श्रीपाद कोठे
नागपूर
रविवार, २१ जानेवारी २०१८