तो

तो फिरतो अजूनही

दिसतो कधीमधी

रस्त्याने जातायेताना,

किती वर्षं झालीत

माझ्या लहानपणापासून पाहतोय

म्हातारा झाला आता,

त्यावेळी असायची मुलं

त्याच्या मागेपुढे

त्यांच्या गोंधळावरूनच

कळायचं, तो आलाय

आता नाही कळत तसं...

एकटाच फिरत असतो

कोणी नाही ओढत

त्याचा शर्ट

कोणी नाही मारत

त्याला हाका

वेगवेगळ्या नावांनी...

तोही नाही देत उत्तर-

आता कोणालाच

किंवा

खाली वाकून

नाही उचलत एखादा दगड

मुलांवर भिरकवायला;

त्याचं वेडंही

अनाथ झालंय आता... !!!

- श्रीपाद कोठे

नागपूर

शनिवार, १४ ऑक्टोबर २०१७