रियाझ

काय सांगता?

गाणी म्हणता तुम्ही?

वा वा, फारच छान

कुठली गाणी म्हणता?

मी म्हणतो गाणी-

मैत्रीची, प्रेमाची, मानवतेची

सत्याची, सेवेची, देवत्वाची

आभाळाची, वसुंधरेची, अज्ञाताची

शांतीची, प्रसन्नतेची, गुढतेची

एकत्वाची, अखंडतेची, अद्वैताची

आत्म्याच्या अंतरात्म्याची

अनंततेची अद्भूत गाणी...

अरे व्वा, छान, छान

बरं एक सांगाल?

हो हो, विचारा ना...

तुम्ही विकलंय कधी स्वत:ला?

कधी चिरून तुकडे तुकडे केलेत स्वत:चे?

अन टाकलेत ते

भुकेल्या लांडग्या, कोल्हया, गिधाडांपुढे?

कधी पाजलंय रक्त स्वत:च स्वत:चं काढून

कुत्र्यांना, मांजरांना?

कधी बोलावलंय वाघा सिंहांना जेवायला

अन स्वत:च स्वत:ला रांधून वाढलंय त्यांना?

कधी लाथाडून घेतलंय आपणच पाळलेल्या

गाढवांकडून, बैलांकडून, हत्तींकडून?

अहो, काय बोलताय तुम्ही हे?

काय म्हणता?

नाही केलं असं काही कधी?

म्हणजे तुम्ही रियाझ करीत नाही म्हणायचं...

- श्रीपाद कोठे

नागपूर

शनिवार, १८ फेब्रुवारी २०१७

माणसे अशीही असतात

अंत्यसंस्काराच्या सामानाच्या दुकानाला
लागूनच असलेल्या
फळांच्या दुकानातून
त्याने घेतली केळीबिळी,
तिथेच बाजूला बसून
खाल्लीत सुद्धा ती फळे,
तो भिकारी नव्हता
माणसांचे वर्ग करणाऱ्या डोळ्यांना
सर्वसामान्य वाटावा असाच होता
पैसे देऊन त्याने घेतली होती फळे
भुकेने कासावीस झाला होता?
की,
जीवन, मरण असा भेद हरवलेला
वेडा? की, फरिश्ता?
-
-
-
माणसे अशीही असतात... ... ...
अंत्यसंस्काराच्या सामानाच्या दुकानाला
खेटूनच फळांचे दुकान लावतात
अन
तेथून फळे घेऊन खातात सुद्धा...

- श्रीपाद कोठे
नागपूर
रविवार, ५ फेब्रुवारी २०१७