???

तो म्हणाला-
जा, मोकळं केलं तुला,
तू कुठेही जाऊ शकतोस आता...
वारा खदखदा हसला,
जाताना म्हणाला-
तू मला धरू तरी शकतोस का?

- श्रीपाद कोठे
नागपूर
सोमवार, २७ एप्रिल २०१५

उतार चढाव

हा म्हणाला-
एवढा चढाव चढायचा आहे,
तो म्हणाला-
एवढा उतार उतरायचा आहे,
कुणीतरी म्हणालं-
इथे ना चढाव आहे, ना उतार आहे,
इथे फक्त रस्ता आहे,
हा बोलला-
रस्त्याच्या पायथ्याजवळून,
तो बोलला-
रस्त्याच्या वरच्या टोकावरून,
कुणीतरी बोललं-
रस्त्याच्या कडेने...
******************************
अस्तित्वात फक्त रस्ता आहे
चढाव आणि उतार
वेगवेगळ्या ठिकाणी
वेगवेगळ्या मनात आहे...
********************************
हा वर गेला की,
चढावाचा उतार होणार आहे,
तो खाली आला की,
उताराचा चढाव होणार आहे

- श्रीपाद कोठे
नागपूर
शनिवार, १८ एप्रिल, २०१५

अव्यक्ताचा डंख

मी मुक्यामुक्याने जेव्हा
आकाशी फिरण्या गेलो
जळात लपला पक्षी
हळूच पाहून आलो

मला पाहुनी हसला
ये ये म्हणुनी वदला
परंतु जाता जवळी
डोळे मिटुनी बसला

मी दिले सोडूनी मौन
पुसिले त्यासी कुशल
तो फक्त हालला आणि
झटकले थोडे पंख

मी शांत पुन्हा मौनात
बसला तोही निवांत
सांगत होतो तरीही
युगायुगातील गुज

निघण्यासाठी वळलो
तसे पसरले पंख
अज्ञातातून आलेला
जैसा अव्यक्ताचा डंख

- श्रीपाद कोठे
नागपूर
शुक्रवार, १७ एप्रिल २०१५

वेडी लिली

लिली वेडी आहे...
चार दिवस
पाऊस काय पडला
फुलून आली लगेच,
तिला नाही माहीत
हा पावसाळा नाही हे-
मीही नाही सांगणार
पण कळेल तिला
तेव्हा वाईट वाटेल,
निसर्गाने,
असे असायला नको ना !!

- श्रीपाद कोठे
नागपूर
शुक्रवार, १७ एप्रिल २०१५