निळ्या डोहातून येते

निळ्या डोहातून येते
निळी जांभळी पहाट
निळ्या वाटेवर घेते
निळाईचा अदमास

निळ्या मनाने सांगते
निळ्या स्वप्नाची कहाणी
निळ्या ओवीत गुंफते
निळ्या डोहाची भूपाळी

निळ्या परसात फुले
निळ्या दवाने नाहली
निळ्या सूर्यकिरणांनी
निळी माया पांघरली

निळी जादू जगण्याची
निळी भूल मरणाची
निळ्या कंठातून येते
निळी शिळ पाखराची

निळे जग, निळे नभ
निळे तन, निळे मन
निळे सर्व चराचर
निळे सारे गहिवर

- श्रीपाद कोठे
नागपूर
सोमवार, २६ मे २०१४