रातकिडे

पावसाच्या रात्री
किरकिरत राहतात
रातकिडे
न दिसणारे, न चावणारे
इकडेतिकडे न फिरणारे...
फक्त जाणीव आवाजाची
एका सुरात, एकाच लयीत...
वर नाही, खाली नाही
वेगात नाही, संथ नाही
आपल्याच तालात,
कधीही न दिसणाऱ्या आवाजाची
जखडून ठेवणारी जादू पसरत
साद घालतात
मनाच्या काळ्यामिट्ट गुहेतील
आपल्या बांधवांना,
बाहेरील रातकिडे- पावसानंतरचे
मनातील रातकिडे- पावसापूर्वीचे
एवढाच फरक
बाकी सारखंच सगळंकाही
अनाम, अदर्षित, एकाकी
कर्कशपण वगैरे...

- श्रीपाद कोठे
नागपूर
मंगळवार, ४ मार्च २०१४