शिवहुंकार

भयंकराला कवेत घेऊन निघतो
वादळ वाऱ्याचे तुकडे करत
भीतीबितीला गचांडी देऊन
कुस्करून टाकतो क्रूरतेची पिलावळ
अस्वस्थतेच्या सौदामिनींची मोडतोड करतो
भिरकावतो माझ्यावर स्वार होणारे
सारे विषारी सर्प
वेदनांचा रुधीराभिषेक करतो स्वत:ला
चावून चोथा करतो सगळ्या काट्यांचा
रक्तबंबाळ लसलसती जिव्हा हलवत
करू लागतो तांडव
मुळासकट अस्तित्व हादरवणारे
अन होत जातो
कणाकणाने चिरशांतीचा
अखंड वर्षाव करणाऱ्या
शिवाचा हुंकार

- श्रीपाद कोठे
नागपूर
सोमवार, १० मार्च २०१४