ऊब

`काय ही थंडी?
ऊनही कोमट लागतं'
असं पुटपुटत
त्याने खुडल्या
काही कळ्या जास्वंदाच्या
अन उमलाव्या म्हणून
परतल्या थोड्या
तवा किंचित गरम करून
त्यावर;
कळ्या फुलल्या नाहीतच
काही कोमेजल्या
काही काळवंडल्या;
कळ्यांना हवी असते ऊब
उमलण्यासाठी
नसतो उपयोग उष्णतेचा;
ऊब वेगळी
उष्णता वेगळी;
हे वेगळेपण कळायला
मिळायला हवी ऊब;
कदाचित त्याला
मिळालीच नसेल...

- श्रीपाद कोठे
नागपूर
गुरुवार, २७ डिसेंबर २०१८