मारवा

सकाळीच साद घालतो मारवा
तेव्हा समजावे
आकाशस्थ आभाळदु:ख
हृदयस्थ झाले आहे,
संध्येच्या दु:खप्रसवा कळा
हात पसरताहेत
थोड्या आसऱ्यासाठी,
मिटल्या डोळ्यांनी
उघडून द्यावे काळीजघर
सताड
सुपूर्द करावा
कोपरा न कोपरा
अन बाहेर पडावे
वर्जित पंचम होऊन,
अन पाहत राहावे
अखंड सृजिता संध्येचे
दु:खसृजन
मिटल्या रंध्रांनी
आर्त न होता,
पंचमाला प्रवाहात सोडूनही
वाहत राहणाऱ्या
मारव्याचा हात धरून...

- श्रीपाद कोठे
नागपूर
शनिवार, २० ऑक्टोबर २०१८