उबदार

खूप थंडी वाजत होती
कुडकुडत होतो
इकडेतिकडे शोधलं
काही मिळतंय का म्हणून
शाल, स्वेटर, रजई
कांबळे, गोधडी वगैरे
नाही मिळालं काहीही
हां, एक आगपेटी मात्र सापडली
म्हटले शेकोटीच पेटवू
पुन्हा एकदा शोधमोहीम
कागद, काटक्या, चिंध्या
लाकडं, खर्डे किंवा गोवऱ्या
पुन्हा नन्नाचा पाढा
नाही सापडलं काहीच
मग पेटवली शेकोटी-
- स्वत:चीच...
आता कसं उबदार वाटतंय अगदी....

- श्रीपाद कोठे
नागपूर
बुधवार, ८ नोव्हेंबर २०१६