मेंदू आईनस्टाईनचा
कधीतरी
आईनस्टाईन म्हणाला होता
पाण्यात पोहणाऱ्या माशाची तुलना
आभाळी उडणाऱ्या पाखरांशी नका करू
आणि तो हेही म्हणाला होता,
आजची शिक्षण पद्धती तेच करतेय
याने मासा राहणार नाही मासा
पक्षी राहणार नाही पक्षी-
दिला होता इशारा त्यानेच;
आम्ही अभ्यासक्रमात
समाविष्ट केला
त्याचाच एक पाठ
आणि शिकवू लागलो
आपल्या मेंदूपेक्षा
कसा वेगळा होता
मेंदू आईनस्टाईनचा
सगळ्या माशांना आणि पक्ष्यांना...
- श्रीपाद कोठे
नागपूर
मंगळवार, १४ नोव्हेंबर २०१७
