राहिली ना आता

राहिली ना आता
ओढ पावसाची
वाळवंटी मन
रमूनी जाई

पावसाच्या धारा
छळती अपार
परी तप्त वाळू
निववी जीवा
हिरव्याची जादू
कोणा मातब्बरी?
भुलवी जयासी
रखरखाट
मनाच्या भिंतीला
जेथे ओल येते
साचते शेवाळ
फसफसुनी
तयापरी बरे
कोरडे पाषाण
भ्रम नाही तेथ
उरला कैसा
- श्रीपाद कोठे
नागपूर
शुक्रवार, 30 जून 2017

श्वास

श्वास
अंतरी बाहेरी
येतो जातो अखंडित
यासी जीवन हे नाव

श्वास
तुझा माझा
झाला एक जेव्हा
राहिलो ना मीच माझा
श्वास
अडला अडला
तुझ्या आठवांची माया
गळा दाटून हा आला
श्वास
आभाळ आभाळ
जसा चंदनाचा परिमळ
गाभाऱ्यात विठू सावळा सजला
श्वास
आभास आभास
वर्ख रूपे सोनियाचा
चैतन्याचा भाव झाकीला झाकीला
- श्रीपाद कोठे
नागपूर
सोमवार, २६ जून २०१७