नित्याप्रमाणे मेसेज येऊ लागले
मोबाईलची घंटी किणकिणाट करून
सूचना देऊ लागली
एका महाराजांच्या
एका भक्ताचा संदेश आला-
तणाव टाळण्यासाठी
हसत खेळत देवाचे नाव घ्या...
मानसशास्त्राच्या हवाल्याने
एकाने पाठवले-
आरोग्यासाठी सतत हसत राहा...
मित्रत्वाच्या पांघरुणातून
सांगितले एकाने-
सदा हसणाराच हवाहवासा वाटतो...
थोड्या वेळाने
एक आगावू सल्ला आला-
तणावमुक्तीसाठी
विनोदी मालिका, चित्रपट पाहा...
सगळ्यांचा आशय एकच
जवळपास...
कोणती विनोदी मालिका
किंवा विनोदी चित्रपट पाहावा?
विचार करता करता
मला आठवण झाली
माझ्याच जीवनाची...
- श्रीपाद कोठे
नागपूर
सोमवार, ५ जून २०१७
